អភិបាលខេត្តកំពង់ចាមជាភ្ញៀវដំបូងគេដែលដើរឆ្លងកាត់«ប្រដឹសប្ញស្សីកោះប៉ែន»
ខេត្តកំពង់ចាម ៖ ប្រដឹសកោះប៉ែនមកដល់ពេលនេះ ត្រូវបានស្ថាបនាស្ទើររួចរាល់ទាំងស្រុងហើយ។ ជាក់ស្ដែង នៅព្រឹកថ្ងៃទី១៩ ខែធ្នូ ឆ្នាំ២០២៣ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានអញ្ជើញដឹកនាំក្រុមការងារមួយក្រុម ចុះមកពិនិត្យមើលការស្ថាបនាប្រដឹសឬស្សី សម្រាប់ឆ្លងពីត្រើយក្រុងកំពង់ចាមទៅរមណីយដ្ឋានឆ្នេរខ្សាច់កោះប៉ែន ស្ថិតក្នុងឃុំកោះមិត្ត ស្រុកកំពង់សៀម។ ដែលនេះបង្ហាញឲ្យឃើញថា ថ្នាក់ដឹកនាំខេត្តគឺជាភ្ញៀវគំរូដំបូងគេបានអញ្ជើញដើរឆ្លងកាត់ប្រដឹសប្ញស្សី ។
លោកស៊ាន សុគុណ ប្រធានមន្ទីរទេសចរណ៍ខេត្តមានប្រសាសន៍ឲ្យដឹងថា តំបន់រមណីយដ្ឋានកែច្នៃឆ្នេរខ្សាច់កោះប៉ែននេះ គឺមានវត្តមានតែក្នុងរដូវប្រាំងប៉ុណ្ណោះ ។ ពេលរដូវវស្សាឈានចូលមកដល់ទីនេះ ត្រូវបានជន់លិចដោយទឹកទន្លេ ហើយប្រដឹសប្ញស្សីត្រូវបានម្ចាស់វិនិយោគធ្វើការរុះរើ សម្រាប់ទុកប្រើ ឬកែច្នៃទៅតាមតម្រូវការផ្សេងៗទៀត ។
ប្រធានមន្ទីរទេសចរណ៍ខេត្តបានបន្តឲ្យដឹងទៀតថា ក្នុងពេលដែលឯកឧត្តមអភិបាលខេត្ត និងក្រុមការងារបានអញ្ជើញដើរឆ្លងកាត់ប្រដឹសឫស្សីនេះ ដែលមានចម្ងាយរហូតដល់ជិត១០០០ម៉ែត្រ ដើម្បីអញ្ជើញទៅពិនិត្យមើលការរៀបចំរមណីយដ្ឋានឆ្នេរខ្សាច់កោះប៉ែន ដែលវិនិយោគដោយលោកប៊ុន ដារា សម្រាប់ទទួលភ្ញៀវជាតិ និងអន្តរជាតិឲ្យមកកម្សាន្តលេងក្នុងឱកាសបុណ្យឆ្លងឆ្នាំសកល២០២៣ ឈានចូល២០២៤ ដែលពេលវេលាកាន់តែរំកិលខិតជិតមកដល់ គឺបានត្រៀមលក្ខណៈសម្បត្តិរួចរាល់ហើយដែរ ។
លោក ប៊ុន ដារ៉ា ប្រធានគ្រប់គ្រងរមណីយដ្ឋានឆ្នេរកោះប៉ែនបានឲ្យដឹងថា ស្ពានប្ញស្សីដែលកំពុងសាងសង់ឆ្លងកាត់ទន្លេ ចាប់ពីត្រើយមុខវត្តដីដុះ ក្នុងសង្កាត់វាលវង់ ក្រុងកំពង់ចាម មកដល់រមណីយដ្ឋានឆ្នេរកោះប៉ែន មានប្រវែង១០០០ ម៉ែត្រ ទទឹង២ម៉ែត្រ ដែលបច្ចុប្បន្នសាងសង់បានជាង៩០% ហើយ ហើយស្ពានប្ញស្សីឆ្នេរកោះប៉ែននេះ អាចនឹងសាងសង់រួច១០០% ក្នុងពេលឆាប់ៗនេះ ហើយបងប្អូនប្រជាពលរដ្ឋភ្ញៀវទេសចរទាំងឡាយ អាចធ្វើដំណើរឆ្លងកាត់ស្ពានដោយថ្មើជើង មកកំសាន្តនៅឆ្នេរកោះប៉ែននេះ ចាប់ពីថ្ងៃទី២២ ខែធ្នូ ឆ្នាំ២០២៣ ខាងមុខនេះ ដឹងបើកឱ្យទទួលភ្ញៀវដើរឆ្លងកាត់មកកំសាន្តលេងនៅឆ្នេរខ្សាច់កោះប៉ែន ។
ចំណែកលោកវែន នាង មេឃុំកោះមិត្តវិញមានប្រសាសន៍ឲ្យដឹងដែរថា ក្នុងពេលដែលបុណ្យចូលឆ្នាំសកលតាមការសង្កេតដោយផ្ទាល់ គឺមានមនុស្សម្នាមកពីទីជិតទីឆ្ងាយមកកំសាន្តលេងនៅរមណីយដ្ឋានឆ្នេរខ្សាច់កោះប៉ែន ស្ថិតនៅក្នុងឃុំកោះមិត្ត ស្រុកកំពង់សៀម ជាមួយនោះនៅម្ដុំគល់ស្ពានបេតុងកោះប៉ែនស្ថិតនៅក្នុងភូមិកំពង់ត្រុំ នៅមិនឆ្ងាយប៉ុន្មានពីរឆ្នេរខ្សាច់ក្បាលកោះប៉ែន ក៏មានប្រជាពលរដ្ឋមកលេងកម្សាន្តច្រើនកុះករ ក្នុងនោះ មានអ្នកខ្លះបានយកតង់មកបោះដេក ដើម្បីឆ្លងឆ្នាំព្រមទាំងបាញ់កាំជ្រួចកំសាន្តលេងពេលរាត្រី។
ចំណែកប្រជាការពារ និងកម្លាំងសមត្ថកិច្ច ត្រូវបានដាក់ពង្រាយទាំងពីរគោលដៅ ដើម្បីពង្រឹងសន្តិសុខនិងសណ្ដាប់ធ្នាប់ជូនដល់ប្រជាពលរដ្ឋឲ្យមានភាពល្អប្រសើរ ។ សូមបញ្ជាក់ថា សម្រាប់រថយន្តវិញ បើចង់មកលេងរមណីយដ្ឋានឆ្នេរខ្សាច់កោះប៉ែន ត្រូវបើកឆ្លងស្ពានបេតុងកោះប៉ែនចូលមកឃុំកោះមិត្តកាត់តាមផ្លូវបេតុងជាច្រើនខ្សែទៅដល់ក្បាលកោះប៉ែន និងមានផ្លូវចុះដល់រមណីយដ្ឋានកោះប៉ែនហើយ។៕
/unnamed.png
Post a Comment