សមត្ថកិច្ចថៃឆ្មក់ចូលក្លិបកម្សាន្តរកឃើញអ្នកប្រើគ្រឿ.ងញៀ.នជាច្រើន

ទីក្រុងបាងកក៖ កាលពីយប់មិញ សមត្ថកិច្ចថៃបានឆ្មក់ចូលក្លិបកម្សាន្តនៅខេត្តសមុទ្ទប្រាកាន និងឃាត់ខ្លួនមនុស្សមួយចំនួន។ ក្រោយពេលធ្វើតេស្តទឹកនោមឃើញថាពួកគេ៧៧នាក់ផ្ទុកសារធាតុញៀន។ លោកអនុទីនក្នុងនាមជារដ្ឋមន្ត្រីមហាផ្ទៃ និងជាឧបនាយករដ្ឋមន្ត្រីថៃ បានដឹកនាំកម្លាំងចុះទៅដល់ទីតាំងក្លិបឈ្មោះថេកផាប់ (Tag Pub) នៅម៉ោង២:៤៥រំលងអធ្រាត្រឆ្លងចូលព្រឹកថ្ងៃសៅរ៍។ សមត្ថកិច្ចចម្រុះរាប់សិបនាក់មកពីច្រើនស្ថាប័នបានចូលរួមនៅក្នុងប្រតិបត្តិការនេះ។ នៅពេលចូលទៅក្នុងក្លិបឃើញភ្ញៀវដែលចូលទៅកម្សាន្តមានគ្នាជាង៣០០នាក់កំពុងតែរាំសប្បាយ និងផឹកស្រា។

គ្រាន់តែក្រឡេកភ្នែកទៅឃើញវត្តមានរបស់សមត្ថកិច្ចច្រើនសន្ធឹកសន្ធាប់បែបនេះ អ្នកចូលក្លិបទាំងប៉ុន្មានរត់ចែកជើងគ្នា ហើយធ្វើឱ្យគ្រឿងញៀនធ្លាក់រាយប៉ាយនៅលើកម្រាលឥដ្ឋ។ ប៉ុន្តែពួកគេទៅណាមិនរួចទេ។ នៅពេលចាប់បានយកទៅពិនិត្យទឹកនោមទាំងប្រុសទាំងស្រី សមត្ថកិច្ចរកឃើញថានារី៣៩នាក់ និងបុរស៣៨នាក់មានសារធាតុញៀននៅក្នុងខ្លួន។

លោកអនុទីនប្រាប់ថាប្រតិបត្តិការនេះធ្វើឡើងបន្ទាប់ពីមានគេរាយការណ៍ថានៅក្នុងក្លិបមានសំឡេងរំខាន និងមានការប្រើប្រាស់គ្រឿងញៀនយ៉ាងអនាធិបតេយ្យ។ ក្លិបនេះបើកហួសម៉ោងកំណត់ទៅតាមការអនុញ្ញាតរបស់សមត្ថកិច្ច។ ទទួលបានដំណឹងនេះភ្លាម សមត្ថកិច្ចចាត់ភ្នាក់ងារសម្ងាត់ចុះទៅបង្កប់ខ្លួននៅក្នុងក្លិបដោយបន្លំខ្លួនជាភ្ញៀវចូលស៊ីផឹក ឬធ្វើជារកទិញគ្រឿងញៀន។ នៅពេលដឹងការពិតហើយ, ក្រុមស៊ើបការណ៍ទាំងនោះក៏ឱ្យសញ្ញាទៅថ្នាក់លើដើម្បីចុះប្រតិបត្តិការភ្លាម។

ម្ចាស់ក្លិបត្រូវបានចាប់ខ្លួនហើយ ហើយចោទប្រកាន់ជាច្រើនករណីដូចជា ទី១-បើកដំណើរការក្លិបលើសម៉ោងកំណត់, ទី២-ឃោសនាលក់គ្រឿងស្រវឹង និងទី៣-បណ្ដោយឱ្យប្រើប្រាស់គ្រឿងញៀននៅក្នុងក្លិប។ លោកអនុទីនបានបញ្ជាឱ្យអភិបាលខេត្តសមុទ្ទប្រាកានបិទដំណើរការក្លិបនេះរយៈពេល៥ឆ្នាំដោយអនុវត្តតាមបទបញ្ជាដែលចូលជាធរមានកាលពីឆ្នាំ២០១៥។

តាមពិត ក្លិបនេះបិទមួយសាហើយកាលពីឆ្នាំ២០១៨ពាក់ព័ន្ធនឹងការប្រើប្រាស់គ្រឿងញៀននៅក្នុងក្លិប។ ក្រោយមក អគារនេះត្រូវបានជួសជុលឡើងវិញ និងដូរឈ្មោះពីណូសក្លិប (Nos Club) ទៅថេកក្លិប (Tag Club) វិញម្ដង។ ក្រសួងមហាផ្ទៃរកឃើញថាក្លិបនេះមិនមែនធម្មតាទេ។ សុទ្ធតែមានអ្នកធំកាងនៅពីក្រោយខ្នង។ ក្រសួងស្នើសុំឱ្យគណៈកម្មការខេត្តស្រាវជ្រាវជាបន្តទៀតដើម្បីចង់ដឹងថាតើនរណាខ្លះនៅពីក្រោយក្លិបនេះ។

នៅក្នុងព្រឹត្តិការណ៍១ទៀតនៅទីក្រុងបាងកក សមត្ថកិច្ចឆ្មក់ចូលក្លិបកម្សាន្តមួយកន្លែងនៅម៉ោង១:៣០រំលងអធ្រាត្រឆ្លងចូលព្រឹកថ្ងៃសុក្រ។ នៅពេលចុះទៅដល់ឃើញអ្នកចូលក្លិបប្រហែល៤០០នាក់។ ក្នុងនោះ សមត្ថកិច្ចរកឃើញថា៤០នាក់អាយុក្រោមម្ភៃឆ្នាំ, ៩២នាក់មានសារធាតុញៀន និង២៦នាក់ជាអនីតិជនដែលមិនទាន់ដល់អាយុត្រូវផឹកស្រានៅឡើយទេ។

គេឃើញគ្រឿងញៀនរាយប៉ាយនៅលើកម្រាលឥដ្ឋដូចជាម៉ាទឹកកក, អ៊ិចស្តាហ្ស៊ី និងម្សៅកេតាមីន (ketamine)។ ក្លិបនេះបើកដំណើរការជាងមួយឆ្នាំហើយ។ កាលពីពេលកន្លងមក សមត្ថកិច្ចធ្លាប់ឆ្មក់ចូលក្លិបនេះដែរ ប៉ុន្តែជនសង្ស័យដឹងខ្លួនមុន និងរត់គេចខ្លួនបាត់អស់ មិនដែលចាប់បានទេ។ សមត្ថកិច្ចត្រៀមកោះហៅម្ចាស់ក្លិបអាយុ៤០ឆ្នាំឡើងតុលាការដើម្បីស្ដាប់ការចោទប្រកាន់ ទី១-បើកក្លិបគ្មានអាជ្ញាប័ណ្ណ, ទី២-អនុញ្ញាតឱ្យភ្ញៀវក្រោមអាយុ២០ឆ្នាំចូលក្លិប និងទី៣-បណ្ដោយឱ្យប្រើប្រាស់គ្រឿងញៀននៅក្នុងក្លិប។ សមត្ថកិច្ចមូលដ្ឋានចង់យករឿងនេះឡើងទៅអគ្គស្នងការដើម្បីបិទក្លិបនេះចោលរយៈពេល៥ឆ្នាំ៕