ហ្វូងដង្កូវចេញរាតត្បាតបំផ្លាញដំណាំស្រូវនិងដំឡូងមីយ៉ាងគំហុក

ខេត្តស្ទឹងត្រែង ៖ ហ្វូងសត្វដង្កូវបាននិងកំពុងរាតត្បាតស៊ីបំផ្លាញដំណាំស្រូវនិងដំឡូងមីរបស់ប្រជាកសិករយ៉ាងគំហុកនៅស្រុកថាឡាបរិវ៉ាត់ ដោយសារការប្រែប្រួលអាកាសធាតុ ។

ប្រធានការរិយាល័យការពារដំណាំនៃអគ្គនាយកដ្ឋានដំណាំអនាម័យនៃក្រសួងកសិកម្ម រុក្ខាប្រមាញ់ និងនេសាទ លោកកង សារ៉េត បានបញ្ជាក់ថា បញ្ហាដែលកសិករជួបប្រទះនេះស្នើឲ្យបងប្អូនជាម្ចាស់ចម្ការនីមួយៗធ្វើការតាមដានឱ្យបានដិតដល់ ព្រោះថា ធ្វើការងារបង្កបង្កើនផល តែងតែពឹងផ្អែកទៅលើផលដំណាំនេះហើយ ដើម្បីធានានូវសន្តិសុខស្បៀងសំរាប់ការរស់នៅ ។

លោកបន្តទៀតថា បងប្អូនកសិករត្រូវអនុវត្តតាមមន្ត្រីជំនាញបច្ចេកទេសដែលបានណែនាំបើមានលទ្ធភាព អាចជីកប្រឡាយព័ទ្ធជំវិញ ហើយបញ្ចូលទឹកនិងបាចកំបោរ ហើយសំអាតព្រៃដែលនៅជុំវិញផង ដើម្បីកំចាត់សត្វចង្រៃកុំឱ្យមកស៊ីដំណាំ នេះជាវិធីសាស្ត្រធ្វើបែបធម្មជាតិនៅតាមមូលដ្ឋានយើង ។

ហើយជម្រើសទី២ គឺប្រើថ្នាំគីមីបាញ់សម្លាប់តែម្តង តែត្រូវអនុវត្តតាមការណែនាំដើម្បីយើងថែរក្សាសុខភាពចៀសវាងពីការពុលដោយសារការប្រើថ្នាំគីមីពុល ។ លោកស្រី មិល ភាន កសិករនៅភូមិពងទឹក បានសម្តែងការព្រួយបារម្ភទៅលើដំណាំស្រូវដែលបច្ចុប្បន្នកសិករយើងដាំដុះបានលូតលាស់ហើយ បែរជាមានហ្វូងសត្វដង្កូវកើតច្រើនមីដេរដាស់មកស៊ីស្រូវ តែមួយយប់២យប់អស់មួយស្រែតែម្តង ។

លោក គឹមជឿន តំណាងឱ្យកសិករដាំដំឡូងមី នៅភូមិរុន ឃុំកាំងចាម បានអះអាងថា ប៉ុន្មានឆ្នាំកន្លងមក មិនដែលកើតមានហ្វូងសត្វដង្កូវមកស៊ីបំផ្លាញស្រូវ និងដំឡូងនេះទេ តែឆ្នាំ២០២៤នេះកសិករ ជួបប្រទះស្ទើរគ្រប់ទីកន្លែងហើយ ។ លោកសាទរបានមន្ត្រីជំនាញកសិកម្ម ថ្នាក់ក្រសួង និងខេត្តបន្តចុះមកណែនាំផ្តល់ពីបច្ចេកទេសនិងវិធីសាស្ត្រ ដើម្បីកំចាត់សត្វចង្រៃនេះ ហើយលោកនិងបន្តផ្សព្វផ្សាយជូនទៅកសិករផ្សេងៗទៀត ដើម្បីរូមគ្នាសម្លាប់ហ្វូងសត្វដង្កូវនេះ ។

សូមបញ្ជាក់ថា បញ្ហាប្រឈមនេះមន្ត្រីជំនាញមន្ទីរកសិកម្មរុក្ខាប្រមាញ់ និងនេសាទខេត្ត ប្រកាសជូនដំណឹង ដល់កសិករគ្រប់មូលដ្ឋាន បើកើតមានសត្វដង្កូវហ្វូងមកស៊ីបំផ្លាញដំណាំអ្វីក៏ដោយ ត្រូវផ្តល់ព័ត៌មានជូន ទៅអាជ្ញាធរ ភូមិ ឃុំ ឬមកមន្ទីរកសិកម្មផ្ទាល់ក៏បាន និងអាចទាក់ទងតាមលេខទូរស័ព្ទ ០៩៧ ២៣៦ ៦១៤ ៥ ដើម្បីមានវិធានការទប់ស្កាត់ឲ្យទាន់ពេល៕